IRCTC : సికింద్రాబాద్ నుంచి ఆధ్యాత్మిక యాత్ర.. తక్కువ ఖర్చులో పుణ్యక్షేత్రాలను చుట్టేద్దాం!
IRCTC : భారతదేశం ఒక ఆధ్యాత్మిక దేశం. దేశం నలుమూలలా ఉన్న పుణ్యక్షేత్రాలను సందర్శించాలని ప్రతి భక్తుడూ కోరుకుంటారు. కానీ, ప్రయాణ ఖర్చులు, వసతి, ఆహారం వంటి అంశాలు చాలామందికి అడ్డంకిగా మారతాయి. ఇలాంటి వారికి భారతీయ రైల్వే ఒక గొప్ప శుభవార్త తీసుకొచ్చింది. IRCTC (ఇండియన్ రైల్వే కేటరింగ్ అండ్ టూరిజం కార్పొరేషన్) భారత్ గౌరవ్ పేరుతో ఒక ప్రత్యేక టూరిస్ట్ రైలును నడుపుతోంది. ఈ రైలు 2025 సెప్టెంబర్ 09న సికింద్రాబాద్ రైల్వే స్టేషన్ నుంచి బయలుదేరనుంది. ఈ ప్యాకేజీ ద్వారా ప్రయాణికులు కేవలం ఒకే యాత్రలో దేశంలోని ప్రసిద్ధ పుణ్యక్షేత్రాలైన అయోధ్య, కాశీ, పూరీతో పాటు మరిన్ని దేవాలయాలను సందర్శించే అవకాశం లభిస్తుంది. ఈ యాత్ర మొత్తం 10 రోజులు (9 రాత్రులు) కొనసాగుతుంది.
ఒకే టికెట్‌లో ప్రముఖ పుణ్యక్షేత్రాల దర్శనం
ఈ ప్యాకేజీలో చేరిన భక్తులు పూరీ, దేవఘర్, వారణాసి, అయోధ్య, ప్రయాగ్‌రాజ్‌లోని ముఖ్యమైన దేవాలయాలను సందర్శిస్తారు. పూరీలో ప్రముఖ శ్రీ జగన్నాథ్ దేవాలయం, చారిత్రక ప్రాధాన్యత కలిగిన కోణార్క్ సూర్య దేవాలయం దర్శనం ఉంటుంది. దేవఘర్‌లో ప్రసిద్ధి చెందిన బాబా బైద్యనాథ్ జ్యోతిర్లింగ దేవాలయం దర్శనం చేసుకునే అవకాశం ఉంటుంది. ఇక ఆధ్యాత్మిక రాజధానిగా పిలువబడే వారణాసిలో కాశీ విశ్వనాథ్ దేవాలయం, దాని కొత్త కారిడార్‌తో పాటు అన్నపూర్ణ దేవి దేవాలయం, కాశీ విశ్వలక్ష్మి దేవాలయం వంటివి సందర్శిస్తారు. ముఖ్యంగా సాయంత్రం జరిగే గంగా హారతి కార్యక్రమం భక్తులకు ఒక ప్రత్యేక అనుభూతిని ఇస్తుంది. అయోధ్యలో నూతనంగా నిర్మించిన రామ జన్మభూమి, హనుమాన్ గఢీ దర్శనం ఉంటుంది. అలాగే ప్రయాగ్‌రాజ్‌లో గంగా, యమునా, సరస్వతి నదుల సంగమ స్థలమైన త్రివేణి సంగమంలో పుణ్య స్నానం చేయవచ్చు.
ఇది కూడా చదవండి : Peaceful Countries: ప్రపంచంలోని టాప్ 10 శాంతియుత దేశాలు
ప్రయాణ సౌకర్యాలు, మార్గం, ధరల వివరాలు
ఈ రైలు ప్రయాణానికి సంబంధించిన అన్ని ఏర్పాట్లను IRCTC చూసుకుంటుంది. ప్రయాణానికి సంబంధించిన రైలు టికెట్, బస, ఆహారం, పర్యాటక స్థలాలకు వెళ్ళడానికి బస్సు లేదా ఇతర వాహనాల సదుపాయం, అలాగే ప్రతి కోచ్‌లో ఒక IRCTC సిబ్బంది అందుబాటులో ఉంటారు. ఈ ప్యాకేజీలో ప్రతిరోజూ మూడు పూటలా భోజనం అందిస్తారు. ప్రయాణికుల బడ్జెట్‌ను బట్టి టికెట్ ధరలు నిర్ణయించారు. స్లీపర్ క్లాస్ (SL)లో ఒక్కొక్కరికి రూ.17,000, 3ఏసీ (3AC)లో రూ.26,700, 2ఏసీ (2AC)లో రూ.35,000గా ధరలు ఉన్నాయి.
- ఇది కూడా చదవండి : Vatican City : 800 మంది మాత్రమే ఉండే దేశం |15 నిమిషాల్లో చుట్టేయొచ్చు
ఈ ప్రత్యేక రైలు సికింద్రాబాద్ రైల్వే స్టేషన్ నుంచి ఉదయం 11:00 గంటలకు బయలుదేరుతుంది. తెలంగాణ, ఆంధ్రప్రదేశ్ రాష్ట్రాల నుంచి ప్రయాణించే భక్తులు కాజీపేట, వరంగల్, ఖమ్మం, విజయవాడ, గుడివాడ, భీమవరం, తణుకు, నిడదవోలు, రాజమండ్రి, సామర్లకోట, తుని, దువ్వాడ, పెందుర్తి, విజయనగరం వంటి స్టేషన్ల నుంచి కూడా రైలు ఎక్కవచ్చు. ఈ ప్యాకేజీ గురించి మరింత సమాచారం తెలుసుకోవడానికి, ప్రయాణికులు IRCTC అధికారిక వెబ్‌సైట్ www.irctctourism.com ని సందర్శించవచ్చు లేదా 9701360701, 9281030712, 9281030750, 9281495845 ఫోన్ నెంబర్లను సంప్రదించవచ్చు. ఈ సువర్ణావకాశాన్ని తెలంగాణ, ఆంధ్రప్రదేశ్‌లోని భక్తులందరూ సద్వినియోగం చేసుకోవాలని IRCTC విజ్ఞప్తి చేస్తోంది.
ఈ కంటెంట్ నచ్చితే షేర్ చేయగలరు. Prayanikudu YouTube Channel ను సబ్‌స్క్రైబ్ చేసుకోండి. WhatsApp ఛానెల్‌లో చేరడానికి ఇక్కడ క్లిక్ చేయండిప్రయాణికుడును facebook, twitter, Instagram లో ఫాలో అవ్వండి.
