Travel Tips 08: హిమాలయాల యాత్రకు వెళ్తే ఈ 5 వస్తువులను తప్పకుండా ప్యాక్ చేసుకోండి
Travel Tips 08: హిమాలయాలు.. పేరు వింటేనే మనసు ఎగిరి గంతులేస్తుంది కదా. మంచు కొండలు, పచ్చని లోయలు, గలగలా పారే సెలయేళ్లు.. ఇలాంటి అద్భుతమైన అందాలను చూడాలని మనందరికీ ఉంటుంది. కానీ, హిమాలయాల యాత్ర అంటే కేవలం అందాలను ఆస్వాదించడం మాత్రమే కాదు, అక్కడి వాతావరణాన్ని తట్టుకోవడం కూడా చాలా ముఖ్యం. ఎందుకంటే, ఒక క్షణంలో ఎండగా మరో క్షణంలో చలి గాలి, మంచు తుఫాను వచ్చే అవకాశం ఉంది. అందుకే, మీ ట్రిప్ సౌకర్యవంతంగా ఉండాలంటే కొన్ని వస్తువులను తప్పకుండా ప్యాక్ చేసుకోవాలి. మీరు ఒక సాహస యాత్రికుడిలా హిమాలయాల అందాలను చూడాలనుకుంటే ఈ టిప్స్ తప్పకుండా పాటించాలి.
హిమాలయాల వాతావరణం ఎంత అందంగా ఉంటుందో, అంత ఊహించని విధంగా ఉంటుంది. అందుకే, సరైన వస్తువులను తీసుకెళ్లకపోతే ఇబ్బందులు పడడం ఖాయం. మీ ప్రయాణం ఎలాంటి ఆటంకాలు లేకుండా సాగాలంటే ఈ ఐదు ముఖ్యమైన వస్తువులను మీ బ్యాగ్‌లో తప్పకుండా పెట్టుకోండి.
లేయర్డ్ క్లోథింగ్
హిమాలయాల వాతావరణం తరచుగా మారుతూ ఉంటుంది కాబట్టి, ఒకేసారి దళసరి బట్టలు వేసుకునే బదులు పొరలవారీగా దుస్తులు(లేయర్డ్ క్లోథింగ్ ) వేసుకోవడం మంచిది. థర్మల్ బేస్ లేయర్ మన శరీరానికి వేడిని అందిస్తుంది. చర్మానికి అతుక్కుని ఉండేలా ఉండే ఈ లేయర్ చలి నుండి రక్షిస్తుంది. ఫ్లీస్ మిడ్ లేయర్ థర్మల్ లేయర్ మీద వేసుకోవడానికి ఇది చాలా సౌకర్యంగా ఉంటుంది. ఇది శరీర వేడిని నిలుపుకుంటుంది. వాటర్‌ప్రూఫ్/విండ్‌ప్రూఫ్ ఔటర్ లేయర్ బయటి నుంచి వచ్చే చలి గాలి, వర్షం, మంచు నుండి రక్షిస్తుంది. ఈ మూడు లేయర్లు ఉంటే, వాతావరణం ఎలా ఉన్నా మీరు సురక్షితంగా ఉండొచ్చు.
వాటర్‌ప్రూఫ్ ట్రెకింగ్ షూస్
సాధారణ షూస్‌తో ట్రెకింగ్ చేయడం చాలా కష్టం. మంచు, బురద, రాళ్లు, నీరు.. ఇలాంటివి మీ ప్రయాణాన్ని మరింత కష్టతరం చేస్తాయి. అందుకే వాటర్‌ప్రూఫ్ ట్రెకింగ్ షూస్ చాలా అవసరం. ఇవి మీ పాదాలను పొడిగా, వెచ్చగా ఉంచుతాయి. ముఖ్యంగా, మంచి గ్రిప్ ఉన్న షూస్ ఎంచుకుంటే జారి పడకుండా ఉంటారు.
ఉన్నితో చేసిన యాక్సెసరీస్
తల, చేతులు, మెడ వంటి శరీర భాగాల నుండి చలి వేగంగా ప్రవేశిస్తుంది. అందుకే ఈ భాగాలను రక్షించుకోవడం చాలా అవసరం. బీనీ తల, చెవులను చలి నుండి కాపాడుతుంది. గ్లౌవ్స్ చేతులను వెచ్చగా ఉంచుతాయి. వాటర్‌ప్రూఫ్ గ్లౌవ్స్ అయితే మంచులో కూడా ఉపయోగపడతాయి. స్కార్ఫ్ లేదా మఫ్లర్ మెడ చుట్టూ చలి గాలి వెళ్లకుండా అడ్డుకుంటుంది.
ఇది కూడా చదవండి: Thailand 2024 : థాయ్‌లాండ్ ఎలా వెళ్లాలి ? ఏం చూడాలి ?
మాయిశ్చరైజర్, లిప్ బామ్
చలి కాలంలో చర్మం త్వరగా పొడిబారుతుంది. ముఖ్యంగా పెదవులు పగిలిపోతాయి. దీని వల్ల చాలా ఇబ్బంది పడాల్సి వస్తుంది. కాబట్టి మీతో మంచి మాయిశ్చరైజర్, లిప్ బామ్ తప్పకుండా తీసుకెళ్లండి. ఇవి మీ చర్మం, పెదవులను పొడిబారకుండా కాపాడతాయి. ముఖ్యంగా సన్‌స్క్రీన్ ఉన్న లిప్ బామ్ ఎంచుకోవడం మంచిది.
రీయూజబుల్ వాటర్ బాటిల్ + పోర్టబుల్ ఫిల్టర్
హిమాలయాల్లో ప్లాస్టిక్ వాడకాన్ని తగ్గించడం చాలా ముఖ్యం. అందుకే, మీతో ఒక రీయూజబుల్ వాటర్ బాటిల్ తీసుకెళ్లండి. అక్కడి నదులు లేదా సెలయేళ్ల నీటిని తాగడానికి ఉపయోగపడే పోర్టబుల్ ఫిల్టర్ కూడా మీతో ఉంటే, ప్లాస్టిక్ బాటిళ్లను వాడాల్సిన అవసరం ఉండదు. ఇది మీ ప్రయాణాన్ని పర్యావరణహితంగా మారుస్తుంది.
ఇది కూడా చదవండి : Dangerous Countries : 2025 లో వెళ్లకూడని అత్యంత ప్రమాదకరమైన 10 దేశాలు
యాత్రికులకు మరికొన్ని ముఖ్యమైన చిట్కాలు
వెచ్చని దుస్తులు దగ్గర పెట్టుకోండి: పర్వతాల వాతావరణం ఎప్పుడైనా మారొచ్చు. అందుకే, మీ వెచ్చని దుస్తులు ఎల్లప్పుడూ మీకు అందుబాటులో ఉండేలా చూసుకోండి.
వైద్య సహాయం: సాధారణ జలుబు, జ్వరం, తలనొప్పి వంటి వాటికి అవసరమైన మందులు, ఫస్ట్ ఎయిడ్ కిట్ మీతో తీసుకెళ్లండి.
పర్మిట్లు, డాక్యుమెంట్లు : కొన్ని ప్రదేశాలకు వెళ్లాలంటే పర్మిట్లు అవసరం. వాటిని ముందుగానే సిద్ధం చేసుకోండి.
వాతావరణం బాగోకపోతే ప్రయాణం రద్దు చేసుకోండి: ఇది చాలా ముఖ్యమైన విషయం. వాతావరణం అనుకూలంగా లేకపోతే, మీ ప్రయాణాన్ని రద్దు చేసుకోవడానికి వెనుకాడకండి. మీ భద్రతే అన్నింటికంటే ముఖ్యం.
ఈ కంటెంట్ నచ్చితే షేర్ చేయగలరు. Prayanikudu YouTube Channel ను సబ్‌స్క్రైబ్ చేసుకోండి. WhatsApp ఛానెల్‌లో చేరడానికి ఇక్కడ క్లిక్ చేయండిప్రయాణికుడును facebook, twitter, Instagram లో ఫాలో అవ్వండి.
