TGSRTC : పండుగ బస్సులు వచ్చేస్తున్నాయ్.. ఈసారి ఏకంగా 7754 స్పెషల్ బస్సులు
TGSRTC : బతుకమ్మ, దసరా పండుగల సందర్భంగా సొంతూళ్లకు వెళ్లే ప్రయాణికులకు శుభవార్త. టీజీఎస్ఆర్టీసీ ఈసారి ఏకంగా 7754 స్పెషల్ బస్సులను నడపడానికి ఏర్పాట్లు చేసింది. ప్రయాణికులు ఎలాంటి ఇబ్బందులు పడకుండా తమ గమ్యస్థానాలకు చేరుకునేలా అన్ని చర్యలు తీసుకుంటున్నామని టీజీఎస్ఆర్టీసీ ఎండీ వి.సి. సజ్జనార్ తెలిపారు.
టీజీఎస్ఆర్టీసీ పండుగ స్పెషల్స్
తెలంగాణ రాష్ట్ర రోడ్డు రవాణా సంస్థ ఈసారి బతుకమ్మ, దసరా పండుగలకు సొంతూళ్లకు వెళ్లే ప్రయాణికుల కోసం భారీ ఏర్పాట్లు చేసింది. పండుగలకు ప్రయాణికులకు ఎలాంటి రవాణా సమస్యలు రాకుండా ఉండేందుకు మొత్తం 7754 స్పెషల్ బస్సులను నడపాలని నిర్ణయించింది. ఇందులో 377 బస్సులకు అడ్వాన్స్ రిజర్వేషన్ సదుపాయం కూడా కల్పించారు. ఈ స్పెషల్ బస్సులు సెప్టెంబర్ 20 నుంచి అక్టోబర్ 2 వరకు అందుబాటులో ఉంటాయి. సద్దుల బతుకమ్మ సెప్టెంబర్ 30న, దసరా అక్టోబర్ 2న ఉండటంతో, సెప్టెంబర్ 27 నుంచి ప్రయాణికుల రద్దీ ఎక్కువగా ఉంటుందని అంచనా వేసి, ఆ తేదీ నుంచి ఎక్కువ బస్సులను నడపనున్నారు. పండుగ తర్వాత తిరిగి వచ్చే ప్రయాణికుల కోసం అక్టోబర్ 5, 6 తేదీలలో కూడా రద్దీని బట్టి బస్సులు ఏర్పాటు చేయనున్నారు.
హైదరాబాద్‌లో స్పెషల్ బస్సులు ఎక్కడెక్కడ?
హైదరాబాద్‌లోని ప్రధాన బస్ స్టేషన్లైన ఎంజీబీఎస్, జేబీఎస్, సీబీఎస్ లతో పాటు, ప్రయాణికుల రద్దీ ఎక్కువగా ఉండే కేపీహెచ్‌బీ కాలనీ, ఉప్పల్ క్రాస్ రోడ్స్, ఉప్పల్ బస్ స్టాండ్, దిల్‍సుఖ్ నగర్, ఎల్‍బీ నగర్, ఆరాంఘర్ వంటి ప్రాంతాల నుంచి కూడా ప్రత్యేక బస్సులు నడపనున్నారు. ఈ బస్సులు హైదరాబాద్, సికింద్రాబాద్ నుంచి రాష్ట్రంలోని అన్ని ప్రాంతాలకే కాకుండా, పొరుగు రాష్ట్రాలైన ఆంధ్రప్రదేశ్, కర్ణాటక, మహారాష్ట్రలకు కూడా వెళ్తాయి.
టికెట్ ధరలు ఎలా ఉంటాయి?
దసరా స్పెషల్ బస్సులకు మాత్రమే టికెట్ ధరలు మారుతాయని టీజీఎస్ఆర్టీసీ తెలిపింది. ఖాళీగా వెళ్ళే బస్సుల డీజిల్ ఖర్చును దృష్టిలో పెట్టుకొని రాష్ట్ర ప్రభుత్వం ఇచ్చిన జీ.వో. నెం. 16 ప్రకారం ధరలను సవరించనున్నారు. ఈ సవరించిన ధరలు సెప్టెంబర్ 20 నుంచి 27 వరకు, అలాగే అక్టోబర్ 1, 5, 6 తేదీలలో నడిచే ప్రత్యేక బస్సులకు మాత్రమే వర్తిస్తాయి. ఈ రోజులలో నడిచే రెగ్యులర్ బస్సుల టికెట్ ధరలలో ఎలాంటి మార్పు ఉండదు.
ఇది కూడా చదవండి : Vatican City : 800 మంది మాత్రమే ఉండే దేశం |15 నిమిషాల్లో చుట్టేయొచ్చు
ప్రయాణికులకు సౌకర్యాలు
టీజీఎస్ఆర్టీసీ ఎండీ వి.సి. సజ్జనార్ మాట్లాడుతూ.. బతుకమ్మ, దసరా పండుగలకు ప్రజలకు సురక్షితమైన, సౌకర్యవంతమైన ప్రయాణాన్ని అందించడానికి తాము సిద్ధంగా ఉన్నామని చెప్పారు. గత దసరా కన్నా ఈసారి 617 స్పెషల్ బస్సులను ఎక్కువగా ఏర్పాటు చేశామని తెలిపారు. రద్దీ ఎక్కువగా ఉండే ప్రాంతాలలో ప్రత్యేక క్యాంపులు ఏర్పాటు చేసి, ప్రయాణికులకు అన్ని సౌకర్యాలు కల్పిస్తున్నామని చెప్పారు. ముఖ్యంగా ఎల్‍బీ నగర్, ఉప్పల్, ఆరాంఘర్, కేపీహెచ్‌బీ, సంతోష్ నగర్ వంటి ప్రాంతాలలో షామియానాలు, కుర్చీలు, మంచి నీరు వంటి సౌకర్యాలను ఏర్పాటు చేయాలని ఇప్పటికే అధికారులకు ఆదేశాలు ఇచ్చామని తెలిపారు. ప్రతి రద్దీ ప్రాంతంలో పర్యవేక్షణాధికారులను నియమించామని, వారు రద్దీని బట్టి బస్సులను అందుబాటులో ఉంచుతారని చెప్పారు.
ఇది కూడా చదవండి : Bhutan : భూటాన్ ఎలా వెళ్లాలి? కంప్లీట్ ట్రావెల్ గైడ్
ప్రైవేట్ వాహనాలకు బదులుగా టీజీఎస్ఆర్టీసీ
పండుగ సమయంలో ప్రైవేట్ వాహనాలలో ప్రయాణించేటప్పుడు ఇబ్బందులు పడకుండా, టీజీఎస్ఆర్టీసీ బస్సులనే ఎంచుకోవాలని సజ్జనార్ సూచించారు. టీజీఎస్‌ఆర్టీసీకి అనుభవం ఉన్న డ్రైవర్లు ఉన్నారని, వారు ప్రయాణికులను సురక్షితంగా గమ్యస్థానాలకు చేర్చుతారని ఆయన చెప్పారు. పండుగ ప్రత్యేక సర్వీసుల కోసం సంస్థ అధికారిక వెబ్‌సైట్ tgsrtcbus.inలో అడ్వాన్స్ రిజర్వేషన్ చేసుకోవచ్చని ఆయన తెలిపారు. మరిన్ని వివరాల కోసం టీఎస్‌ఆర్టీసీ కాల్ సెంటర్ నెంబర్లు 040-69440000, 040-23450033ను సంప్రదించవచ్చని సూచించారు.
ఈ కంటెంట్ నచ్చితే షేర్ చేయగలరు. Prayanikudu YouTube Channel ను సబ్‌స్క్రైబ్ చేసుకోండి. WhatsApp ఛానెల్‌లో చేరడానికి ఇక్కడ క్లిక్ చేయండిప్రయాణికుడును facebook, twitter, Instagram లో ఫాలో అవ్వండి.
