Vinayaka Chavithi : ఈ గణపతి గుడిలో వింత ఆచారం.. దీని వెనుక ఉన్న కథ వింటే ఆశ్చర్యపోతారు ?
Vinayaka Chavithi : దేశవ్యాప్తంగా గణపతి ఉత్సవాలు అత్యంత వైభవంగా జరుగుతున్నాయి. ప్రతిచోటా మండపాలు, భజనలు, ఊరేగింపులతో ఆధ్యాత్మిక వాతావరణం నెలకొంది. అయితే, మహారాష్ట్రలోని బీడ్ జిల్లాలో ఒక ప్రత్యేకమైన సంప్రదాయం అందరి దృష్టిని ఆకర్షిస్తోంది. నవగన్ రాజురి గ్రామంలోని ఒక గణపతి ఆలయంలో, ప్రసాదం పంపిణీకి ఒక విచిత్రమైన పద్ధతిని పాటిస్తారు. భక్తులు తాము తెచ్చుకున్న గొడుగులను తిరగేసి పట్టుకుని, వాటిలో ప్రసాదం అందుకుంటారు. ఈ ఆచారం వెనుక ఉన్న ఆసక్తికరమైన కథ ఏంటో ఇప్పుడు తెలుసుకుందాం.
గణపతి పండుగ సందర్భంగా జరిగే ఈ అరుదైన ఆచారం మహారాష్ట్రలోని బీడ్ జిల్లాలోని నవగన్ రాజురి గ్రామంలో వెలుగులోకి వచ్చింది. ఈ ఆచారానికి సంబంధించిన వీడియోలు, ఫోటోలు సోషల్ మీడియాలో వైరల్ అవుతున్నాయి. ఆలయ నిర్వాహకులు ప్రతి సంవత్సరం అఖండ హరినామ వారోత్సవాలు నిర్వహిస్తారు. ఈ వారోత్సవాల ముగింపు సందర్భంగా ఈ ప్రత్యేక సంప్రదాయాన్ని పాటిస్తారు. ఈ పండుగలో పాల్గొనడానికి చుట్టుపక్కల గ్రామాల నుంచి కూడా పెద్ద సంఖ్యలో భక్తులు తరలివస్తారు.
గొడుగులతో ప్రసాదం ఎందుకు?
ఆలయ ప్రాంగణంలో భజనలు, కీర్తనల మధ్య భక్తులంతా గుమిగూడతారు. వారికి మహా ప్రసాదాన్ని పంపిణీ చేయడానికి, ఆలయం పైకప్పు నుండి ప్రసాదం విసిరివేస్తారు. కింద నిలబడిన భక్తులు తమ గొడుగులను తిరగేసి పట్టుకుంటారు. పై నుంచి పడే ప్రసాదం ఆ గొడుగులలోకి పడుతుంది. ఈ వినూత్న పద్ధతి ద్వారా ఒకేసారి వేలాది మంది భక్తులకు ప్రసాదాన్ని పంపిణీ చేయవచ్చు. ముఖ్యంగా, తొక్కిసలాట జరగకుండా ప్రశాంతంగా ప్రసాదం అందరికీ చేరుతుంది.
ఇది కూడా చదవండి : Vatican City : 800 మంది మాత్రమే ఉండే దేశం |15 నిమిషాల్లో చుట్టేయొచ్చు
ఈ ప్రత్యేకమైన ఆచారం గురించి ఆలయ పూజారి మాట్లాడుతూ.. “మా ఆలయంలో ఈ సంప్రదాయం చాలా ఏళ్లుగా కొనసాగుతోంది. భక్తులకు ఒకేసారి ప్రసాదం పంపిణీ చేయడానికి ఇది సులభమైన మార్గం. మాకు గణపతి ఆశీస్సులు ఉన్నాయని నమ్ముతాం. భక్తులు భక్తిశ్రద్ధలతో ప్రసాదం అందుకుని ఇంటికి తిరిగి వెళ్తారు” అని తెలిపారు. భక్తులు కూడా ఈ ఆచారంపై చాలా సంతోషం వ్యక్తం చేశారు. “ఇలా ప్రసాదం అందుకోవడం చాలా ప్రత్యేకంగా ఉంటుంది. ఇది చాలా పవిత్రమైన అనుభూతిని ఇస్తుంది” అని ఒక భక్తుడు చెప్పారు.
ఇది కూడా చదవండి : Vanuatu: వనవాటు దేశం ఎక్కడుంది ? ఎలా వెళ్లాలి ? కంప్లీట్ ట్రావెల్ గైడ్
అఖండ హరినామ వారోత్సవం
గణేష్ చతుర్థి సందర్భంగా నవగన్ రాజురి గ్రామంలో సెప్టెంబర్ 1న అఖండ హరినామ వారోత్సవాన్ని నిర్వహించారు. ఈ వారోత్సవాలు శ్రీకృష్ణ భగవానుడి నామస్మరణతో జరుగుతాయి. ప్రతి సంవత్సరం ఈ పండుగ సందర్భంగా భజనలు, కీర్తనలు, ప్రవచనాలతో ఆలయ ప్రాంగణం నిండిపోతుంది. ఉత్సవాల చివరి రోజున, ఆలయం పైకప్పు నుంచి ప్రసాదం పంపిణీ చేస్తారు. ఈ ఆచారం కేవలం ప్రసాదం పంపిణీకే కాకుండా, భక్తులను ఏకతాటిపైకి తెచ్చే ఒక గొప్ప సంప్రదాయంగా నిలిచింది.
ఈ కంటెంట్ నచ్చితే షేర్ చేయగలరు. Prayanikudu YouTube Channel ను సబ్‌స్క్రైబ్ చేసుకోండి. WhatsApp ఛానెల్‌లో చేరడానికి ఇక్కడ క్లిక్ చేయండిప్రయాణికుడును facebook, twitter, Instagram లో ఫాలో అవ్వండి.
