Laknavaram Lake: కేరళ, అరకు అందాలు ఒక్కచోటే.. తెలంగాణలోని ఒక అద్భుతమైన టూరిస్ట్ స్పాట్
Laknavaram Lake: మీరు అడవి అందాలు, కొండల మధ్య ఉన్న సరస్సు సౌందర్యాన్ని ఒకే చోట ఆస్వాదించాలనుకుంటున్నారా? అయితే మీరు కచ్చితంగా లక్నవరం సరస్సు (Laknavaram Lake) ను సందర్శించాల్సిందే. తెలంగాణ రాష్ట్రంలోని ములుగు జిల్లా, గోవిందరావుపేట మండలం, బూస్సాపూర్ శివారులో ఉన్న ఈ లక్నవరం చెరువు నిజంగా ఒక అద్భుతమైన పర్యాటక కేంద్రం. పర్యాటకులకు, ప్రకృతి ప్రేమికులకు ఇక్కడి వాతావరణం ఎంతో ఆహ్లాదాన్ని కలిగిస్తుంది. ఈ లక్నవరం సరస్సును చూసిన వారికి కోనసీమ, కేరళ, అరకు ప్రాంతాలకు వెళ్ళిన అనుభూతి కలుగుతుందని చెప్పడంలో అతిశయోక్తి లేదు.
లక్నవరం చరిత్ర, ప్రత్యేకతలు
లక్నవరం సరస్సుకు సుదీర్ఘ చరిత్ర ఉంది. ఇది కాకతీయ రాజు ప్రతాపరుద్రుడి కాలం నాటిదిగా చరిత్ర చెబుతోంది. ఈ సరస్సు వరంగల్ నుంచి 70 కిలోమీటర్ల దూరంలో ఉంది. ఇటీవలి భారీ వర్షాల కారణంగా లక్నవరం చెరువు నిండు కుండలా మారింది. ఈ సరస్సులో అనేక ద్వీపాలు (Islands) ఉండటం దీనికి మరో ప్రత్యేకత. సరస్సు చుట్టూ దట్టమైన అటవీ ప్రాంతం, కొండలు ఉండటం వలన పర్యాటకులు ఇక్కడి వాతావరణాన్ని ఎంజాయ్ చేయడానికి పెద్ద సంఖ్యలో వస్తుంటారు.
ఊయల వంతెనలు
లక్నవరం సరస్సులోని ప్రధాన ఆకర్షణలలో ఊయల వంతెన (Uyyala Bridge) ముఖ్యమైనది. ఈ వంతెనపై నడుస్తుంటే కలిగే అనుభూతి చాలా భిన్నంగా ఉంటుంది. ఈ సరస్సుపై రెండు ఊయల వంతెనలు ఉన్నాయి. ఈ వంతెనలు పర్యాటకులను అక్కడున్న పార్కు, హరిత హోటల్, బోటింగ్ స్పాట్ వైపు తీసుకువెళ్తాయి. వీకెండ్ సమయాల్లో ఈ వంతెనపై పర్యాటకుల రద్దీ ఎక్కువగా ఉంటుంది. పర్యాటకులు ఇక్కడ సెల్ఫీలు, ఫోటోలు దిగుతూ సరదాగా గడుపుతారు. ఇప్పటికే ఈ లక్నవరం సరస్సు ప్రాంతంలో అనేక సినిమాల షూటింగ్లు జరిగాయి. అలాగే పెళ్లి షూటింగ్లకు కూడా ఇది అద్భుతమైన ప్రదేశమని చెప్పవచ్చు.
ఇది కూడా చదవండి : Egypt Travel Guide: ఈజిప్ట్..ఇక్కడ డబ్బు కట్టి సమాధులను చూస్తారు.. 15 Facts
వసతి, వినోద సదుపాయాలు
లక్నవరానికి వచ్చే పర్యాటకుల కోసం ఇక్కడ అన్ని రకాల వినోద సదుపాయాలు అందుబాటులో ఉన్నాయి. పర్యాటకులు ఇక్కడ బోట్ రైడ్స్, స్పీడ్ బోట్లు, సైక్లింగ్ బోట్లలో ప్రయాణించి సరదాగా గడుపుతారు. తెలంగాణ టూరిజం ఆధ్వర్యంలో నడుస్తున్న హరిత హోటల్ ఇక్కడ ఉంది. చాలా మంది పర్యాటకులు ద్వీపంలో ఉన్న కాటేజీలలో బస చేయడానికి ఇష్టపడతారు. ఈ కాటేజీలలో ఏసీ మరియు నాన్-ఏసీ గదులు అందుబాటులో ఉన్నాయి. ఇక్కడ ఉండాలనుకునేవారు ఆన్లైన్లో కాటేజీలను ముందుగానే బుక్ చేసుకోవాలి.ఇక్కడ ఫోటో షూట్లు, అడ్వెంచర్ గేమ్స్, క్యాంప్ఫైర్, రాత్రిపూట బస (Night Stay). క్యాంపింగ్ సౌకర్యాలు కూడా అందుబాటులో ఉన్నాయి.
ఇది కూడా చదవండి : Dangerous Countries : 2025 లో వెళ్లకూడని అత్యంత ప్రమాదకరమైన 10 దేశాలు
ఎంట్రీ వివరాలు
లక్నవరం సరస్సు వద్ద ఉదయం 8 గంటల నుంచి సాయంత్రం 5.30 గంటల వరకు మాత్రమే ప్రవేశ సమయం ఉంటుంది.
ఎంట్రీ ఫీజు: ఈ వంతెన ఎక్కడానికి పెద్దలకు రూ.10, పిల్లలకు రూ.5 ప్రవేశ రుసుముగా ఉంటుంది.
పర్యాటకుల రద్దీ: ఉమ్మడి జిల్లా నుండే కాకుండా రాష్ట్రం నలుమూలల నుంచి పర్యాటకులు లక్నవరం అందాలను చూడటానికి పెద్ద సంఖ్యలో వస్తుంటారు.
ఈ కంటెంట్ నచ్చితే షేర్ చేయగలరు. Prayanikudu YouTube Channel ను సబ్స్క్రైబ్ చేసుకోండి. WhatsApp ఛానెల్లో చేరడానికి ఇక్కడ క్లిక్ చేయండిప్రయాణికుడును facebook, twitter, Instagram లో ఫాలో అవ్వండి.
