Rath Yatra : ఆషాఢ మాసం వచ్చిందంటే చాలు ఒడిశాలోని పూరీ సిటీలో పండగ వాతావరణం నెలకొంటుంది. దేశం నలుమూలల నుంచి, కాదు కాదు, ప్రపంచం నలుమూలల నుంచి కూడా లక్షలాది మంది జనం వచ్చి జగన్నాథ రథయాత్ర చూడ్డానికి ఎగబడతారు. జగన్నాథుడు, బలభద్రుడు, సుభద్రమ్మ అనే ముగ్గురు దేవతలు, తమ గుడిలోంచి బయటికొచ్చి, మన వీధుల్లో అందరికీ దర్శనమిచ్చే పండుగ. చూడ్డానికే అద్భుతంగా ఉంటుంది. ఇది మామూలు పండగ కాదు, వందల ఏళ్ల చరిత్ర, సంప్రదాయాలు, బోలెడన్ని నమ్మకాలు, పురాణ కథలు అన్నీ దీని వెనుక ఉన్నాయి.
జగన్నాథుని రథయాత్ర ఒడిశాలోని పూరీలో నేడు అంగరంగ వైభవంగా జరుగుతోంది. ఈ వేడుకలో 12 లక్షల మందికి పైగా దేశవిదేశాల నుంచి వచ్చిన భక్తులు పాల్గొంటారన్న అంచనాతో అధికార యంత్రాంగం విస్తృత ఏర్పాట్లను చేసింది. భద్రతకు ప్రాధాన్యమిచ్చిన ప్రభుత్వం తొలిసారిగా 275 ఏఐ కెమెరాలు, డ్రోన్ల ద్వారా రద్దీ నియంత్రణకు ఏర్పాట్లు చేసింది. దీనికితోడు 10 వేల మంది జవాన్లను నియమించింది. అంతేకాకుండా ఈ ఏడాది 69 తాత్కాలిక ఆరోగ్య కేంద్రాలు, 64 అంబులెన్స్‌లు, 265 ప్రత్యేక ఆసుపత్రి పడకలు, 378 అదనపు డాక్టర్లు, పారామెడికల్ సిబ్బంది డ్యూటీలో ఉండనున్నారు. మరి ఈ పండుగ విశేషాలు, రథాలను ఎలా తయారు చేస్తారు, ఏమేం నమ్మకాలు ఉన్నాయో వివరంగా తెలుసుకుందాం.
రథాలు ఎలా తయారు చేస్తారు?
జగన్నాథ రథయాత్రకు కొన్ని నెలల ముందే రథాల తయారీ మొదలవుతుంది. ఏటా కొత్త రథాలనే తయారు చేస్తారు. ఇది చిన్న పనేం కాదు, చాలా పెద్ద ప్రాసెస్. రథాల పని అక్షయ తృతీయ రోజున మొదలవుతుంది. పూరీ రాజు ప్యాలెస్ ఎదురుగా ఉన్న గుడి ఆఫీస్ పక్కన ఒక పవిత్రమైన పూజ చేసి పని ప్రారంభిస్తారు. ఈ రథాల కోసం ప్రత్యేకంగా ఎంచుకున్న వేప చెట్టు కలపను మాత్రమే వాడతారు. ఇది చాలా పవిత్రంగా భావిస్తారు. మొత్తం మూడు రథాలు ఉంటాయి. ఒక్కో దేవుడికి ఒక్కో రథం.
నందిఘోష : ఇది జగన్నాథుడి రథం. ఈ మూడింట్లోకెల్లా ఇదే పెద్దది. దీనికి 16 చక్రాలు ఉంటాయి. ఎరుపు, పసుపు రంగుల్లో ఉంటుంది.
తలాధ్వజ : ఇది బలభద్రుడి రథం. దీనికి 14 చక్రాలు ఉంటాయి. ఇది ఎరుపు, ఆకుపచ్చ రంగుల్లో ఉంటుంది.
దర్పదలన : ఇది సుభద్రమ్మ రథం. దీనికి 12 చక్రాలు ఉంటాయి. ఎరుపు, నలుపు రంగుల్లో ఉంటుంది.
ఇది కూడా చదవండి : Vatican City : 800 మంది మాత్రమే ఉండే దేశం |15 నిమిషాల్లో చుట్టేయొచ్చు
రథాల పైభాగాలు అచ్చం గుడి గోపురంలాగే కనిపిస్తాయి. పూరీలో ఉన్న అత్యంత నేర్పరులైన 15 మంది దర్జీలు 1200 మీటర్ల గుడ్డతో రథాల పైకప్పులు కుడతారు. వాటిపై అందమైన చెక్కడాలు, డిజైన్‌లు ఉంటాయి.
రథయాత్రకు ముందు జరిగే స్పెషల్ పూజలు
స్నాన పూర్ణిమ : రథయాత్రకు కొద్ది రోజుల ముందు, జ్యేష్ఠ పౌర్ణమి నాడు, దేవుళ్ళకు 108 కుండల పవిత్రమైన నీటితో స్నానం చేయిస్తారు.
అనవసర : స్నానం తర్వాత దేవుళ్ళకు జ్వరం వచ్చి అనారోగ్యంగా ఉన్నారని నమ్ముతారు. అందుకే దాదాపు 15 రోజుల పాటు వారిని ఎవరికీ కనిపించకుండా ఒక గదిలో ఉంచుతారు. ఈ టైంలో వారికి మందు గుణాలున్న మూలికలను ఇస్తారు. ఈ పదిహేను రోజులు గుడిని కూడా మూసేస్తారు. ఆ తర్వాతే దేవుళ్ళు మళ్లీ కొత్తగా, ఆరోగ్యంగా దర్శనమిస్తారు.
రథయాత్ర వెనుక ఉన్న కథలు, నమ్మకాలు:
ఈ రథయాత్ర వెనుక చాలా ఆసక్తికరమైన కథలు, నమ్మకాలు ఉన్నాయి. జగన్నాథుడు, బలభద్రుడు, సుభద్రమ్మ.. వీళ్ళంతా తమ అత్తగారి ఇల్లు అయిన గుండిచా మందిరానికి వెళ్తారని నమ్ముతారు. అక్కడ వారం రోజులు ఉండి, ఆ తర్వాత మళ్ళీ తమ గుడికి తిరిగి వస్తారు. ఇలా తిరిగి వచ్చే ప్రయాణాన్ని బహుదా యాత్ర అంటారు. తిరిగి వచ్చేటప్పుడు, మౌసి మా ఆలయం దగ్గర ఆగి, వారికి ఇష్టమైన పోడ పితా అనే స్పెషల్ స్వీట్‌ను తింటారట. రథయాత్రలో దేవుళ్ళను చూసినా, లేదా రథాలను లాగడానికి సహాయపడినా, మన పాపాలన్నీ పోయి మోక్షం లభిస్తుందని భక్తులు చాలా గట్టిగా నమ్ముతారు. రథాల తాడును ఒక్కసారి తాకినా కూడా పెద్ద పుణ్యం వస్తుందంటారు.
ఇది కూడా చదవండి : Peaceful Countries: ప్రపంచంలోని టాప్ 10 శాంతియుత దేశాలు
రథయాత్రలో ఒక ముఖ్యమైన పద్ధతి ‘ఛేరా పహన్రా’. పూరీ రాజు స్వయంగా వచ్చి, బంగారు చీపురుతో రథాల ముందు రోడ్డును శుభ్రం చేస్తారు, చందనం నీళ్లు చల్లుతారు. అంటే, దేవుడి దృష్టిలో రాజు అయినా, మామూలు మనిషి అయినా అందరూ సమానమే అని దీని అర్థం. ఇది పనిని గౌరవించమని, అహం లేకుండా ఉండమని చెబుతుంది. జగన్నాథుడి విగ్రహాలకు చేతులు, కాళ్ళు పూర్తిగా ఉండవు. ఇది ఎందుకు ఇలా ఉందంటే ఒక కథ ఉంది. విశ్వకర్మ దేవత విగ్రహాలను చెక్కుతున్నప్పుడు, పని పూర్తి కాకముందే రాజు వచ్చి చూశాడట. అందుకే విగ్రహాలు అసంపూర్ణంగా మిగిలిపోయాయని నమ్మకం. ఈ అసంపూర్ణ రూపం, దేవుడు అనంతమైనవాడు అని, మన మానవ పరిమితులకు అతీతంగా ఉంటాడని సూచిస్తుంది.
జగన్నాథుడు తన భక్తులను కలవడానికి గుడిలోంచి బయటికి వీధుల్లోకి వస్తాడని నమ్ముతారు. అంటే దేవుడు అందరికీ అందుబాటులో ఉంటాడని, కుల, మత భేదాలు లేకుండా అందరినీ దీవించడానికి వస్తాడని దీని అర్థం. ఇంగ్లీష్‌లో ‘జగ్గర్‌నాట్’ అనే ఒక పదం ఉంది. అంటే చాలా శక్తివంతమైనది అని అర్థం. ఈ పదం జగన్నాథ్ రథం నుంచే వచ్చిందని చెబుతారు. బ్రిటిష్ వాళ్ళు ఈ రథయాత్ర చూసినప్పుడు, రథం చాలా బరువుగా, ఆపలేనట్లుగా ముందుకు వెళ్లడం చూసి ఈ పదాన్ని వాడారట.
పూరీ జగన్నాథ రథయాత్ర అనేది కేవలం ఒక పండుగ మాత్రమే కాదు. ఇది భక్తి, మన సంస్కృతి, చరిత్ర, అందరూ సమానం అనే భావం కలగలిసిన ఒక పెద్ద వేడుక. ఈ యాత్రలో పాల్గొనడం చాలా మందికి ఒక మంచి అనుభూతిని ఇస్తుంది.
ఈ కంటెంట్ నచ్చితే షేర్ చేయగలరు. Prayanikudu YouTube Channel ను సబ్‌స్క్రైబ్ చేసుకోండి. WhatsApp ఛానెల్‌లో చేరడానికి ఇక్కడ క్లిక్ చేయండిప్రయాణికుడును facebook, twitter, Instagram లో ఫాలో అవ్వండి.