తిరుమల శ్రీవారికి రోజూ 45 రకాల నైవేద్యాలు.. పేర్లు వింటే ఆశ్చర్యపోతారు | Tirumala Naivedyam

Tirumala Naivedyam : తిరుమల శ్రీవారి ఆలయంలో ప్రతిరోజూ సమర్పించే 45 రకాల నైవేద్యాల వెనుక ఉన్న వైఖానస ఆగమ సంప్రదాయం, ప్రత్యేక పేర్లు, ఉదయం నుంచి రాత్రి వరకు జరిగే నైవేద్య వివరాలు తెలుసుకోండి.

తిరుమల వెళ్లే చాలామంది భక్తులకు లడ్డూ, పులిహోర, దద్దోజనం వంటి ప్రసాదాలు బాగా తెలుసు. కానీ ఇవి కేవలం భక్తులకు అందించే ప్రసాదాలు మాత్రమే కాదు. శ్రీవారి ఆలయంలో జరిగే నిత్య కైంకర్యాల్లో ప్రతి నైవేద్యానికి ఒక ప్రత్యేక పేరు, తయారీ విధానం, సమర్పించే సమయం ఉన్నాయి.

టీటీడీ ప్రకారం శ్రీవారికి ప్రతిరోజూ మొత్తం 45 రకాల ప్రసాదాలను నైవేద్యంగా సమర్పిస్తారు. ఇందులో 20 రకాల అన్నప్రసాదాలు, 25 రకాల పణ్యారాలు ఉంటాయి. ఈ సంప్రదాయం వెనుక వైఖానస ఆగమ విధానాలకు ప్రత్యేక స్థానం ఉంది.

• ఇది కూడా చడవండి : 1000 ఏళ్ల క్రితం తిరుమలలో బ్రహ్మోత్సవం ఎలా జరిగేదో తెలుసా? శాసనాల్లో బయటపడ్డ అసలు నిజం

పులిహోర పేరు కూడా ఇంత ప్రత్యేకమా?

(Pulihora : Traditional Name)

మనకు సాధారణంగా తెలిసిన పులిహోర, పొంగలి, బెల్లం అన్నం, వడ వంటి పదార్థాలకు శ్రీవారి నైవేద్య సంప్రదాయంలో ప్రత్యేక పేర్లు ఉన్నాయి. పులిహోరను తింత్రిణీరసాన్నం, నెయ్యి పొంగలిని ముద్గాన్నం, బెల్లం అన్నాన్ని గుడాన్నం, మిరియాల అన్నాన్ని మరీచ్యాన్నం అని పిలుస్తారు.

అలాగే వడకు మాషాపూపం, దోశకు చక్రప్పం వంటి పేర్లు ఉపయోగిస్తారు.

ఇక్కడ మరో ఆసక్తికరమైన విషయం ఏమిటంటే నైవేద్య తయారీలో ఎండుమిర్చి, పచ్చిమిర్చికి బదులుగా నల్లమిరియాలను ఉపయోగించడం సంప్రదాయంగా కొనసాగుతోందని టీటీడీ తెలిపింది.

ఉదయం నుంచి రాత్రి వరకు నైవేద్యాల క్రమం

Daily Naivedyam Timeline : శ్రీవారి ఆలయంలో నైవేద్యం ఒకే సమయంలో పూర్తయ్యే కార్యక్రమం కాదు. రోజులో వివిధ సమయాల్లో జరిగే కైంకర్యాలకు అనుగుణంగా వేర్వేరు పదార్థాలను సమర్పిస్తారు.

• ఇది కూడా చదవండి : తిరుమలలో క్యూఆర్ కోడ్ ఆధారిత పాదరక్షకాల కౌంటర్ | TTD QR Code Based Footwear Counters Guide

ఉదయం మొదటి గంట అనంతరం:

మాత్రాన్నం, ముద్గాన్నం, తింత్రిణీరసాన్నం, దధ్యోదనం, గుడాన్నం, శాకాన్నం, శర్కరాన్నం వంటి అన్నప్రసాదాలను సమర్పిస్తారు.

వీటితో పాటు లడుకం, మాషాప్పం, గుడప్పం, చక్రప్పం వంటి నాలుగు రకాల పణ్యారాలను కూడా సమర్పిస్తారు.

మధ్యాహ్నం రెండో గంట అనంతరం జరిగే రాజభోగంలో:

శుద్ధాన్నం, పులిహోర, గుడాన్నం, దధ్యోదనం, శీరా లేదా శక్కరభాత్ వంటి పదార్థాలు నైవేద్యంగా ఉంటాయి.

రాత్రి మూడో గంట అనంతరం జరిగే శయనభోగంలో:

మరీచ్యాన్నం, చక్రప్పం, లడుకం, మాషాప్పం, శర్కరాన్నం తదితర ప్రసాదాలను సమర్పిస్తారు.

అర్ధరాత్రి కూడా ప్రత్యేక నైవేద్యం

(Night Offering)

శ్రీవారి నైవేద్య సంప్రదాయంలో మరో ఆసక్తికరమైన అంశం అర్ధరాత్రి సమర్పించే తిరువీసం.

సాయంకాల కైంకర్యాల అనంతరం జరిగే శయనభోగంలో భాగంగా తిరువీసం సమర్పిస్తారు. ఇందులో తెల్ల అన్నంతో పాటు బెల్లంతో తయారు చేసే గుడాన్నం ఉంటుంది.

• ఇది కూడా చదవండి : తిరుమలలో ఎక్కడ, ఎప్పుడు, ఎలా ఉచిత భోజనం లభిస్తుంది? | Tirumala Annaprasadam Guide

రోజు చివర జరిగే ఏకాంత సేవలో వెచ్చని పాలు, కాలానుగుణంగా లభించే పండ్ల ముక్కలు, నెయ్యిలో వేయించిన ఎండు పండ్లు సమర్పిస్తారు.

తిరుమల ప్రయాణాన్ని కేవలం దర్శనం, లడ్డూ, రద్దీతో మాత్రమే చూడకూడదు. ఆలయంలో జరిగే ప్రతి కైంకర్యం వెనుక ఒక ప్రత్యేకమైన సంప్రదాయం ఉంటుంది.

• ఈ నైవేద్యాల విషయంలో ముఖ్యంగా గమనించాల్సినవి:
• రోజుకు మొత్తం 45 రకాల నైవేద్యాలు సమర్పిస్తారు.
• వాటిలో 20 రకాల అన్నప్రసాదాలు, 25 రకాల పణ్యారాలు ఉంటాయి.
• పులిహోర, పొంగలి, బెల్లం అన్నం వంటి మనకు పరిచయమైన పదార్థాలకు ప్రత్యేక సంప్రదాయ పేర్లు ఉన్నాయి.
• నైవేద్య తయారీలో పదార్థాలు, పాత్రలు, తయారీ విధానాలకు ప్రాధాన్యం ఉంటుంది.
• ఉదయం, మధ్యాహ్నం, రాత్రి వేర్వేరు సందర్భాల్లో నైవేద్యాలు సమర్పిస్తారు.
• అంటే తిరుమలలో భోజనం కూడా ఆలయ ఆగమ సంప్రదాయంలో ఒక భాగమే.

తిరుమల వెళ్లే భక్తులు ఈ వివరాలను ఎక్కడ తెలుసుకోవచ్చు?

(Where Travellers Can Learn More)

ఇక్కడ ఒక విషయం స్పష్టంగా తెలుసుకోవాలి. పై వివరాలు ఆలయంలో భక్తులు స్వయంగా చూసే ఒక శాసనం లేదా ప్రదర్శన కాదు. నైవేద్య కైంకర్యాల్లోని అనేక అంశాలు ఆలయ అంతర్గత ఆచారాలకు సంబంధించినవి.

అయితే తిరుమలలోని ఎస్వీ మ్యూజియంలో ఆలయ చరిత్ర, ఆగమ సంప్రదాయాలు, పూజా విధానాలకు సంబంధించిన ప్రదర్శనలు ఉన్నాయి. టీటీడీ అధికారిక సమాచారం ప్రకారం అక్కడ ఆగమంలో ఉపయోగించే పాత్రల సేకరణ కూడా ప్రదర్శనలో ఉంది.

ప్రయాణికుడిగా నా సూచన ఏమిటంటే.. శ్రీవారి దర్శనంతో పాటు ఎస్వీ మ్యూజియాన్ని కూడా సమయం ఉంటే చూడండి. అప్పుడు తిరుమల ఆలయాన్ని కేవలం దర్శన స్థలంగా కాకుండా శతాబ్దాలుగా కొనసాగుతున్న సంప్రదాయాల కేంద్రంగా అర్థం చేసుకోవచ్చు.

• ఇది కూడా చదవండి : తిరుమల శ్రీవారి ఆలయాన్ని ఎవరు నిర్మించారు ? శ్రీవారు వైకుంఠం విడిచి ఎందుకు వచ్చారు?

తిరుమల నైవేద్యాల వెనుక ఉన్న సంప్రదాయం

(The Tradition Behind Srivari Naivedyam)

టీటీడీ వెల్లడించిన వివరాల ప్రకారం శ్రీవారి ఆలయంలో నైవేద్యాలు వైఖానస ఆగమ సంప్రదాయాలకు అనుగుణంగా నిర్వహిస్తారు. పదార్థాల తయారీ నుంచి వాటిని సమర్పించే సమయం వరకు ఒక నిర్దిష్టమైన పద్ధతి ఉంటుంది.

అందుకే భక్తులకు సాధారణంగా కనిపించే పులిహోర, పొంగలి, వడ, దోశ వంటి పదార్థాల వెనుక కూడా ఒక ప్రత్యేకమైన ఆలయ సంప్రదాయం కనిపిస్తుంది.

తిరుమల ప్రయాణంలో ఇలాంటి విషయాలను తెలుసుకోవడం వల్ల దర్శన అనుభవానికి మరో కోణం చేరుతుంది.

తరచుగా అడిగే ప్రశ్నలు

(FAQ)

శ్రీవారికి ప్రతిరోజూ ఎన్ని రకాల నైవేద్యాలు సమర్పిస్తారు?

టీటీడీ ప్రకారం రోజూ మొత్తం 45 రకాల నైవేద్యాలను సమర్పిస్తారు. వీటిలో 20 రకాల అన్నప్రసాదాలు, 25 రకాల పణ్యారాలు ఉన్నాయి.

పులిహోరను వైఖానస సంప్రదాయంలో ఏమని పిలుస్తారు?

పులిహోరను తింత్రిణీరసాన్నం అని పిలుస్తారు.

భక్తులు ఈ నైవేద్యాలను నేరుగా చూడగలరా?

నైవేద్య కైంకర్యాలు ఆలయ అంతర్గత ఆచారాల్లో భాగం. కాబట్టి భక్తులు ప్రతి నైవేద్యాన్ని తయారు చేయడం లేదా సమర్పించడం నేరుగా చూసే అవకాశం ఉండదు. అయితే ఆలయ సంప్రదాయాలు, ఆగమ విధానాల గురించి ఎస్వీ మ్యూజియం వంటి ప్రదేశాల్లో మరింత ఇన్ఫర్మేషన్ తెలుసుకోవచ్చు.

▶️ వీడియో చూడండి : పండరిపురం ట్రావెల్ గైడ్