No Airport Countries : వీటి తెలివి అదుర్స్.. పక్క దేశాల ఎయిర్‌పోర్టులను వాడుకుంటూ టూరిజంలో దూసుకెళ్తున్న దేశాలివే
No Airport Countries : ప్రపంచంలో దాదాపు ప్రతి మూలకూ విమాన ప్రయాణం అందుబాటులో ఉన్న ఈ ఆధునిక యుగంలో, కొన్ని దేశాలు మాత్రం తమ సొంత విమానాశ్రయం లేకుండానే అద్భుతంగా రాణిస్తున్నాయి. ఈ దేశాలు ఏకంగా లక్షల సంఖ్యలో పర్యాటకులను ఆకర్షిస్తూ, గ్లోబల్ టూరిజం మ్యాప్‌లో టాప్ స్థానంలో నిలవడం ఆశ్చర్యకరం. 2025 నాటికి కూడా, ఈ ఐదు దేశాలు ఎయిర్‌పోర్ట్ లేని టాప్ టూరిస్ట్ హాట్‌స్పాట్స్ గా కొనసాగుతున్నాయి. వీటికి విమానాశ్రయాలు లేకపోయినా, పక్క దేశాల ఎయిర్‌పోర్టులను తెలివిగా వాడుకుంటూ, తమ ప్రత్యేకతతో టూరిస్టులను ఎలా ఆకర్షిస్తున్నాయో వివరంగా తెలుసుకుందాం.
మొనాకో (Monaco)
మొనాకో ప్రపంచంలోనే అతి చిన్న దేశాలలో ఒకటి. ఇక్కడ విమానాశ్రయం లేదు, కానీ ప్రపంచ పర్యాటకులను ఆకర్షించడంలో ఇది ముందుంది. సూపర్ యాచ్‌లు, లగ్జరీ హోటళ్లు, ప్రసిద్ధ ఫార్ములా-1 రేస్ సర్క్యూట్‌తో ఇది ప్రపంచవ్యాప్తంగా గుర్తింపు పొందింది. పర్యాటకులు ఫ్రాన్స్‌లోని నీస్ ఎయిర్పోర్ట్కు వచ్చి, అక్కడి నుంచి కేవలం 20-30 నిమిషాల్లో కారు లేదా హెలికాప్టర్‌లో మొనాకో చేరుకోవచ్చు. పక్క దేశం ఎయిర్‌పోర్టును వాడుకుంటూ, లగ్జరీ టూరిజంలో మొనాకో సూపర్ సక్సెస్ అయింది.
లీచెన్‌స్టెయిన్ (Liechtenstein)
ఆస్ట్రియా, స్విట్జర్లాండ్‌ల మధ్య ఉన్న ఈ చిన్న రాజ్యానికి కూడా సొంత విమానాశ్రయం లేదు. ఇది ఆల్పైన్ పర్వతాలు, పురాతన కోటలు, మరియు ప్రశాంతమైన గ్రామాలతో పర్యాటకులను ఆకర్షిస్తుంది. స్విట్జర్లాండ్‌లోని జ్యూరిచ్ ఎయిర్‌పోర్ట్ నుంచి కేవలం ఒక గంటలో కారు లేదా రైలులో ఇక్కడికి చేరుకోవచ్చు. ఇది చిన్న దేశం కావడంతో, తక్కువ దూరంలోనే ఎక్కువ పర్యాటక ప్రాంతాలను చూసే అవకాశం ఉండటం పర్యాటకులకు కలిసివస్తుంది.
వాటికన్ సిటీ (Vatican City)
ప్రపంచంలోనే అతి చిన్న స్వతంత్ర దేశం వాటికన్ సిటీ. ఇది పోప్ నివాసంగా, అద్భుతమైన నిర్మాణ కళకు నిలయంగా ప్రపంచవ్యాప్తంగా ప్రసిద్ధి చెందింది. ఇటలీ రాజధాని రోమ్‌లోని ఫ్యూమిచీనో ఎయిర్పోర్ట్కు వచ్చి, అక్కడి నుంచి కేవలం 30 నిమిషాల్లో వాటికన్ చేరుకోవచ్చు. ఇక్కడి చారిత్రక వైభవం, అందమైన నిర్మాణాలు పర్యాటకులకు జీవితకాలపు జ్ఞాపకంగా మిగిలిపోతాయి.
అండోరా (Andorra)
పిరనీస్ పర్వతాల మధ్య ఉన్న అండోరా దేశానికి కూడా విమానాశ్రయం లేదు. ఈ దేశం స్కీయింగ్, షాపింగ్, అద్భుతమైన మంచుతో కప్పబడిన పర్వతాలకు ప్రసిద్ధి. సాహస క్రీడలు, ట్రెక్కింగ్ ఇష్టపడేవారు ఎక్కువగా అండోరాను సందర్శిస్తారు. స్పెయిన్‌లోని బార్సిలోనా లేదా ఫ్రాన్స్‌లోని టౌలూస్ ఎయిర్పోర్ట్కు వచ్చిన తర్వాత, అక్కడి నుంచి బస్సు లేదా హెలికాప్టర్‌లో అద్భుతమైన పర్వత మార్గంలో ప్రయాణించి అండోరా చేరుకుంటారు.
ఇది కూడా చదవండి : Egypt Travel Guide: ఈజిప్ట్..ఇక్కడ డబ్బు కట్టి సమాధులను చూస్తారు.. 15 Facts
శాన్ మారినో (San Marino)
ఇటలీ మధ్యలో రాతి కొండపై ఉన్న ఈ పురాతన దేశం ప్రపంచంలోనే అత్యంత పురాతన రిపబ్లిక్‌లలో ఒకటిగా పరిగణించబడుతుంది. ఇక్కడి మధ్యయుగపు టవర్లు, రాతి వీధులు, కొండపై నుంచి కనిపించే అద్భుతమైన దృశ్యాలు పర్యాటకులను ఆకర్షిస్తాయి. ఇటలీలోని రిమిని ఎయిర్‌పోర్ట్ నుంచి రోడ్డు మార్గంలో ప్రయాణించి ఈ ప్రశాంత దేశానికి చేరుకోవచ్చు. సిటీ గోల నుంచి రిలాక్స్ కావాలనుకునే వారికి ఈ దేశం అనువైనది.
ఇది కూడా చదవండి : Vanuatu: వనవాటు దేశం ఎక్కడుంది ? ఎలా వెళ్లాలి ? కంప్లీట్ ట్రావెల్ గైడ్
2025లో కూడా ఈ ఐదు దేశాలు విమానాశ్రయం లేకుండానే ప్రపంచ పర్యాటక మ్యాప్‌లో టాప్ స్థానంలో కొనసాగడానికి కారణం, వాటికి ఉన్న ప్రకృతి సౌందర్యం, చారిత్రక వైభవం, లగ్జరీ ఆకర్షణే. ఈ చిన్న దేశాలు కావడంతో, పక్కనున్న దేశాల ఎయిర్‌పోర్టులు వీటికి అనుసంధానంగా ఉపయోగపడుతున్నాయి. ఈ వ్యూహమే వీటికి ప్లస్ అవుతోంది.
ఈ కంటెంట్ నచ్చితే షేర్ చేయగలరు. Prayanikudu YouTube Channel ను సబ్‌స్క్రైబ్ చేసుకోండి. WhatsApp ఛానెల్‌లో చేరడానికి ఇక్కడ క్లిక్ చేయండిప్రయాణికుడును facebook, twitter, Instagram లో ఫాలో అవ్వండి.
