Saraswati Temples : బాసర ఒక్కటే కాదు.. తెలంగాణలో ఉన్న సరస్వతీ దేవాలయాల గురించి తెలుసా ? ఎలా వెళ్లాలంటే ?
Saraswati Temples : తెలుగు రాష్ట్రాల్లో ముఖ్యంగా తెలంగాణలో సరస్వతీ దేవి ఆలయాలు కేవలం పూజా స్థలాలే కాకుండా, విద్యార్థులకు ఆత్మవిశ్వాసాన్ని అందించే పుణ్యక్షేత్రాలుగా విలసిల్లుతున్నాయి. జ్ఞానాన్ని, విద్యను ప్రసాదించే తల్లిగా కొలిచే సరస్వతీ అమ్మవారు, రాష్ట్రంలోని వివిధ ప్రాంతాల్లో ప్రత్యేక రూపాల్లో కొలువై ఉన్నారు. ఈ ఆలయాల వెనుక ఉన్న చరిత్ర, స్థల పురాణాలు, వాటి ప్రత్యేకతల గురించి వివరంగా తెలుసుకుందాం. ముఖ్యంగా నిర్మల్ జిల్లాలోని బాసర, సిద్దిపేట జిల్లాలోని అనంతసాగర్, వర్గల్, హైదరాబాద్‌లోని ప్రముఖ సరస్వతీ క్షేత్రాల విశేషాలను, వాటిని ఎలా చేరుకోవాలో తెలుసుకుందాం.
బాసర సరస్వతి ఆలయం
బాసర క్షేత్రం తెలంగాణలోనే కాకుండా దేశవ్యాప్తంగా ప్రసిద్ధి చెందిన జ్ఞాన సరస్వతి ఆలయం. నిర్మల్ జిల్లాలో పవిత్ర గోదావరి నది ఒడ్డున కొలువైన ఈ ఆలయం, అష్టాదశ పురాణాలను రచించిన వేదవ్యాసుడు స్వయంగా ప్రతిష్ఠించిన విగ్రహంతో పూజలు అందుకుంటున్నది. కురుక్షేత్ర సంగ్రామం తర్వాత మానసిక ప్రశాంతత కోసం తపస్సు చేయాలని నిర్ణయించుకున్న వ్యాస మహర్షి, గోదావరి తీరంలో ఒక ఆశ్రమాన్ని నిర్మించుకున్నారు. ఆయన తపస్సుకు మెచ్చిన అమ్మవారు ప్రత్యక్షమై, లక్ష్మీ, సరస్వతి, పార్వతి మూర్తులను అక్కడ ప్రతిష్ఠించమని ఆదేశించింది. వ్యాసుడు గోదావరి నది నుంచి మూడు గుప్పిళ్ల ఇసుక తెచ్చి, వాటితో లక్ష్మి, సరస్వతి, పార్వతీదేవి విగ్రహాలను రూపొందించి ప్రతిష్ఠించాడని స్థల పురాణం చెబుతుంది. ఇక్కడ ముఖ్యంగా ఇసుకతో తీర్చిదిద్దిన భారతి విగ్రహానికి పసుపు పూసి ప్రత్యేక పూజలు నిర్వహిస్తారు. వ్యాసుడు తపస్సు చేసిన ప్రదేశం కావడంతో ఈ క్షేత్రం మొదట్లో వ్యాసపురిగా, తర్వాత వాసరగా కాలక్రమంలో బాసరగా స్థిరపడింది. ఈ ఆలయ సమీపంలోనే లక్ష్మీదేవి, పార్వతీదేవి ఆలయాలు కూడా ఉన్నాయి. వసంత పంచమి, శరన్నవరాత్రులు వంటి పర్వదినాల్లో వేలాదిగా భక్తులు ఇక్కడికి తరలివచ్చి సరస్వతి అమ్మవారిని దర్శించుకుంటారు. విద్యార్థులకు అక్షరాభ్యాసం చేయించడానికి ఇది ఒక ప్రముఖ కేంద్రం.
ఎలా చేరుకోవాలి?:
రైలు మార్గం: హైదరాబాద్ నుండి బాసరకు నేరుగా రైలు సౌకర్యం ఉంది. బాసర రైల్వే స్టేషన్ ఆలయం నుంచి చాలా దగ్గరగా ఉంటుంది.
రోడ్డు మార్గం: హైదరాబాద్ నుంచి NH44 ద్వారా నిర్మల్ చేరుకుని, అక్కడి నుంచి బాసరకు సులభంగా చేరుకోవచ్చు. రాష్ట్రంలోని వివిధ ప్రాంతాల నుంచి ఆర్టీసీ బస్సులు అందుబాటులో ఉన్నాయి.
అనంతసాగర్‌లో నిల్చున్న వీణాపాణి
సాధారణంగా సరస్వతీదేవి కమలంపై ప్రశాంతంగా కూర్చుని దర్శనమిస్తుంటుంది. అయితే, సిద్దిపేట జిల్లా చిన్నకోడూరు మండలం అనంతసాగర్ క్షేత్రంలో అమ్మవారు అందుకు భిన్నంగా నిల్చున్న వీణాపాణిగా కొలువై ఉన్నారు. ఈ ఆలయ ప్రాంగణం ప్రకృతి రమణీయతతో నిండి ఉంటుంది. ఈ ప్రాంతానికి చెందిన అష్టావధాని నరసింహరామశర్మ చొరవతో ఈ సరస్వతి ఆలయాన్ని నిర్మించారు. 1980లో ఆలయ నిర్మాణానికి శంకుస్థాపన చేయగా, 1990లో విగ్రహ ప్రతిష్ఠ జరిగింది. చదువులతల్లి ఆలయ ప్రాంగణంలోనే సౌభాగ్యలక్ష్మి, మహంకాళి అమ్మవారి గుళ్లు కూడా ఉండటం ఇక్కడ మరో ప్రత్యేకత.
ఎలా చేరుకోవాలి?:
రోడ్డు మార్గం: హైదరాబాద్ నుంచి కరీంనగర్ వెళ్లే దారిలో శనిగరం వద్ద దిగి, అక్కడి నుంచి రోడ్డు మార్గంలో అనంతసాగర్ చేరుకోవచ్చు. సిద్దిపేట జిల్లా కేంద్రం నుంచి కూడా బస్సు లేదా ఆటోలో చేరుకోవడం సులువు.
ఇది కూడా చదవండి : Indian License : భారతీయ లైసెన్స్ ఈ 15 దేశాల్లో కూడా చెల్లుతుంది
వర్గల్ శారదాంబ
సిద్దిపేట జిల్లాలోని వర్గల్ క్షేత్రం కూడా విద్యా సరస్వతి దేవాలయంగా ప్రసిద్ధి చెందింది. హైదరాబాద్ మహానగరానికి సుమారు 41 కి.మీ. దూరంలో ఉండటంతో ఈ ఆలయానికి భక్తుల రద్దీ ఎక్కువే. బాసర క్షేత్రానికి వెళ్లలేని వారు వర్గల్ అమ్మవారిని దర్శించుకొని ఆధ్యాత్మిక తృప్తిని పొందుతుంటారు. ఇక్కడ కూడా నిత్యం చిన్నారులకు అక్షరాభ్యాసం నిర్వహిస్తారు. 1992లో ఆలయ ప్రతిష్ఠ జరిగింది. కంచి మఠం ఆధ్వర్యంలో ఈ ఆలయ నిర్వహణ జరుగుతున్నది.
ఎలా చేరుకోవాలి?:
రోడ్డు మార్గం: హైదరాబాద్ నుండి మేడ్చల్, తూప్రాన్ మీదుగా వర్గల్‌కు సులభంగా చేరుకోవచ్చు. ఆర్టీసీ బస్సులు, ప్రైవేట్ వాహనాలు నిత్యం అందుబాటులో ఉంటాయి.
ఇది కూడా చదవండి : ప్రపంచ యుద్ధం వస్తే ఈ 10 దేశాలు చాలా సేఫ్
హైదరాబాద్‌లోని సరస్వతీ క్షేత్రాలు
హైదరాబాద్ మహానగరం కూడా సరస్వతీ ఆలయాలకు నిలయంగా ఉంది, ఇవి నగరం నలుమూలల నుండి భక్తులను ఆకర్షిస్తాయి. ఉస్మానియా యూనివర్సిటీ పచ్చటి ప్రకృతితో నిండిన విద్యానిలయంగా ప్రసిద్ధి చెందింది. ఈ చదువుల ప్రాంగణంలోనే సరస్వతీ దేవి కొలువై ఉన్నారు. ఆర్ట్స్ కాలేజ్ సమీపంలో ఉన్న శారదాదేవి ఆలయానికి రోజూ వందలమంది విద్యార్థులు వస్తుంటారు. అలాగే సికింద్రాబాద్ సమీపంలోని ముషీరాబాద్‌లోనూ దశాబ్దాల చరిత్ర ఉన్న సరస్వతీదేవి ఆలయం కనిపిస్తుంది. శృంగేరి పీఠం ఆధ్వర్యంలో ఈ ఆలయాన్ని 1950లో నిర్మించారు.
ఎలా చేరుకోవాలి?:
ఉస్మానియా యూనివర్సిటీ ఆలయం: సిటీలోని ఏ ప్రాంతం నుంచైనా బస్సులు లేదా మెట్రో రైలు ద్వారా ఉస్మానియా యూనివర్సిటీకి చేరుకోవచ్చు. యూనివర్సిటీ లోపల ఆలయం ఉంటుంది.
ముషీరాబాద్ ఆలయం: సికింద్రాబాద్ లేదా నాంపల్లి నుంచి బస్సులు, ఆటోలు లేదా ఎంఎంటీఎస్ ద్వారా ముషీరాబాద్ చేరుకోవచ్చు.
ఈ కంటెంట్ నచ్చితే షేర్ చేయగలరు. Prayanikudu YouTube Channel ను సబ్‌స్క్రైబ్ చేసుకోండి. WhatsApp ఛానెల్‌లో చేరడానికి ఇక్కడ క్లిక్ చేయండిప్రయాణికుడును facebook, twitter, Instagram లో ఫాలో అవ్వండి.
