Tirupati Airport : లక్షలాది మంది భక్తులు శ్రీ వెంకటేశ్వర స్వామి ఆశీస్సులు పొందడానికి తిరుమలకు వెళ్తుంటారు. వారికి ఆ ప్రయాణం కూడా గుడికి వెళ్లినంత పవిత్రమైనదే. దీన్ని గుర్తించిన తిరుమల తిరుపతి దేవస్థానం, భక్తులు వచ్చే ముఖ్యమైన ప్రదేశాలైన తిరుపతి ఎయిర్‌పోర్ట్, అలిపిరి ఆర్చ్‌లను ఆధ్యాత్మికంగా మార్చడానికి ఒక అదిరిపోయే ప్లాన్‌ను ప్రకటించింది. వీటిని తిరుమల పవిత్రతకు కొనసాగింపుగా మార్చబోతున్నారు.
ప్రస్తుతం తిరుపతి ఎయిర్‌పోర్ట్‌లో తిరుమల ఆలయ పట్టణం గొప్పదనాన్ని, సంస్కృతిని చూపించే దృశ్యాలు, సంకేతాలు లేవు. టెర్మినల్ లోపల ఒకే ఒక చిత్రం తప్ప, మిగతా చోట్ల ఆధ్యాత్మిక వాతావరణం పెద్దగా ఉండదు. రోజుకు వేల మంది విమానాల్లో వస్తున్నారు. వారికి తిరుమల దివ్య వాతావరణాన్ని విమానాశ్రయంలోనే కలిగేలా చేయకపోవడంతో ప్రస్తుతం వారంతా ఒక గొప్ప అవకాశాన్ని కోల్పోతున్నారని అధికారులు అంటున్నారు.
టీటీడీ, కేంద్ర విమానయాన మంత్రిత్వ శాఖకు ఒక ప్రపోజల్ పంపింది. తిరుపతి ఎయిర్‌పోర్ట్‌ను పూర్తిగా తిరుమల ఆలయ ఆర్కిటెక్చర్‌తో రీ డిజైన్ చేయబోతున్నారు. అంటే, ఆలయంలో ఉన్నట్లుగా చెక్కిన గోడలు, ఆలయ గోపురాలను పోలిన శిల్పాలు, భక్తిని కలిగించే అందమైన డిజైన్‌లు ఇక్కడ చూడొచ్చు. ఇది కేవలం ఎయిర్‌పోర్ట్‌కు కొత్త లుక్ ఇవ్వడం కాదు. భక్తులు ఎయిర్‌పోర్ట్‌లో అడుగుపెట్టినప్పటి నుంచే ఆధ్యాత్మిక శక్తిని పొందే వాతావరణాన్ని సృష్టించే ప్రయత్నం ఇది.
ఇది కూడా చదవండి : అంటార్కిటికా : 70 శాతం మంచినీరు ఇక్కడే ఉంది…రాత్రి సూరీడు…పగలు చీకటి
అదే విధంగా, భక్తులు తిరుమల కొండకు కాలినడకన వెళ్లే అలిపిరి ఆర్చ్‌ను కూడా మార్చబోతున్నారు. ఈ ఆర్చ్‌ను మహా మండపం లాగా డిజైన్ చేయబోతున్నారు. ఇది దక్షిణ భారత సంప్రదాయ ఆలయ నిర్మాణ శైలిలో ఉండే ఒక పెద్ద హాలు. డిజైనర్ ఆనంద్ సాయి చెప్పిన ప్రకారం.. ఈ ఆర్చ్‌ను పూర్తిగా రాళ్లతో కట్టబోతున్నారు. ఇది పాత కాలపు ఆలయ నిర్మాణ పద్ధతులతో, రాళ్లతో నిర్మిస్తున్నారు. రాబోయే 500 సంవత్సరాల వరకు బలంగా, భక్తికి ప్రతీకగా ఉండేలా దీన్ని నిర్మిస్తున్నారట!
లక్షలాది మంది భక్తులు పాదరక్షలు లేకుండా భక్తితో నడిచే అలిపిరి కాలిబాట కూడా ఈ పెద్ద రీడిజైన్ ప్లాన్‌లో ఉంది. ఈ దారిలో చేయబోయే అప్‌గ్రేడ్‌లు ఏంటంటే నడిచేటప్పుడు అలసిపోతే విశ్రాంతి తీసుకోవడానికి వీలుగా నీడ కోసం షెడ్లను ఏర్పాటు చేయనున్నారు. ప్రకృతి అందాలను ఆస్వాదించేలా దారి పొడవునా పచ్చదనం పెంచుతారు. శ్రీ వెంకటేశ్వర స్వామి జీవితంలోని కథలను, సంఘటనలను చూపించే కళాకృతులు ఏర్పాటు చేయనున్నారు. పవిత్రమైన కథలు, పురాణాలను వివరించే బోర్డులు ఏర్పాటు చేయనున్నారు. ఈ కార్యక్రమం కేవలం శారీరక నడకను కాకుండా, ప్రతి అడుగులోనూ ఆధ్యాత్మిక అనుభూతిని పొందేలా మార్చాలని లక్ష్యంగా పెట్టుకుంది.
ఇది కూడా చదవండి : Ramayana Trail : శ్రీలంకలో రామాయణం టూరిజం…ఏం చూపిస్తారు? ఎలా వెళ్లాలి ? Top 5 Tips
తిరుపతి ఎయిర్‌పోర్ట్, అలిపిరిలో ఈ మార్పులు భక్తులకు అద్భుతమైన ఆధ్యాత్మిక అనుభూతిని ఇస్తాయి. ప్రయాణం మొదలుపెట్టినప్పటి నుంచే తిరుమల దివ్య వాతావరణాన్ని అనుభవించడం చాలా గొప్ప విషయం. ఇది తిరుమల పవిత్రతను మరింత పెంచుతుంది.
ఈ కంటెంట్ నచ్చితే షేర్ చేయగలరు. Prayanikudu YouTube Channel ను సబ్‌స్క్రైబ్ చేసుకోండి. WhatsApp ఛానెల్‌లో చేరడానికి ఇక్కడ క్లిక్ చేయండిప్రయాణికుడును facebook, twitter, Instagram లో ఫాలో అవ్వండి.